Në gjysmën e parë të këtij viti, pronat janë shitur 41.7% më shtrenjtë se në gjashtëmujorin e parë të vitit të kaluar. Sipas Raportit të Stabilitetit Financiar të Bankës së Shqipërisë, Indeksi Fischer i çmimit të banesave në rang vendi u rrit me 14.6% në terma gjashtëmujorë, dhe me 41.7% ndaj një viti më parë.
Rritja e çmimeve në zonën e Tiranës ka qenë shumë e fortë. Në shumicën e rasteve, çmimi i blerjes së pronës ka qenë i njëjtë ose deri në 5% më i ulët se çmimi i kërkuar nga shitësi dhe kjo nuk ka ndryshuar nga viti i kaluar.
Por sa kohë i është dashur në prone që të shitet?
Një pronë është shitur më me vështirësi në Tiranë se në zonat bregdetare. Koha mesatare e shitjes së banesave në rang vendi u rrit në 11.6 muaj, nga 9.3 muaj në vrojtimin e mëparshëm. Në rastin e Tiranës, koha mesatare e shitjes u rrit ndjeshëm në 11.1, nga 7.1 muaj.
Nga ana tjetër, koha mesatare për shitjet në zonat bregdetare ra në 8.7, nga 10 muaj, ndërsa për zonat e tjera, kohëzgjatja e shitjes ishte pak më e lartë sesa në gjashtëmujorin e kaluar, duke u rritur në 12.8, nga 11.6 muaj, raporton Scan Tv.
Edhe çmimet e qirave rezultojnë me rritje, sipas raportimeve nga agjentët që kryejnë aktivitet në zonën e kryeqytetit. Sipas tyre, kërkesa e përgjithshme për marrje me qira raportohet më e lartë nga kërkesa gjatë gjashtëmujorit të mëparshëm.
Financimi nëpërmjet kredisë bankare ka vijuar të figurojë në një pjesë të mirë të shitjeve të pronave. Sipas agjentëve, ashtu si periudhën e kaluar, 58% e pronave për banim dhe e atyre për përdorim tregtar të shitura prej tyre janë blerë me hua bankare. Nga këto, në 62% të rasteve, kredia ka mbuluar deri në 60% të vlerës.
Gjatë gjashtëmujorit të parë të vitit 2025 janë blerë më pak banesa nga shtetasit e huaj. Kështu, rreth 15% e banesave të shitura janë raportuar të blera nga shtetas jorezidëntë krahasuar me 18% për gjashtëmujorin e mëparshëm.
