Një pikturë e veçantë e Pablo Picassos, e titulluar “Busti i një gruaje me kapelë me lule”, do të dalë për shitje në ankand në Paris më 24 tetor, pas një periudhe mbi 80 vjeçare fshehjeje. Piktura, me përmasa 81 x 60 centimetra, pritet të arrijë një çmim prej rreth 9.45 milion dollarësh. Ajo paraqet fotografen dhe piktoren franceze Dora Maar, një nga muzat më të njohura të Picasso-s, e cila është përshkruar duke veshur një kapelë të gëzueshme me lule, me nuanca pastel jeshile, blu dhe të verdha.
Pavarësisht përdorimit të ngjyrave të gjalla, shprehia në fytyrën e Dora Maar-it është interpretuar si shqetësuese nga ekspertët e artit, të cilët theksojnë rëndësinë historike dhe artistike të kësaj vepre. Siç shpjegon Agnès Sevestre-Barbé, eksperte në artin e Picasso-s, piktura është krijuar në korrik të vitit 1943, në një periudhë të vështirë historike gjatë pushtimit nazist të Parisit.
Gjatë këtij viti, Picasso kishte filluar të takohej me piktoren Françoise Gilot, por në atë kohë, Dora mbetej modelja e tij kryesore. Piktura e sapozbuluar u ble në 1944 nga një koleksionist i paidentifikuar dhe ka qëndruar në pronësi të familjes së tij që atëherë. Sipas Barbé, kjo vepër nuk ka qenë kurrë e ekspozuar publikisht dhe nuk ka marrë pjesë në ndonjë ankand më të hershëm.
Ankandi në Paris nga shtëpia e ankandeve Lucien pritet të tërheqë vëmendjen e koleksionistëve dhe dashamirësve të artit, duke e bërë këtë një nga ngjarjet më interesante në botën e artit për vitin 2023. Shumë ekspertë besojnë se ndjenja dhe historia e kësaj vepre do ta bëjnë atë një pjesë të vyer për çdo koleksion artistik.
