Ministri për Evropën dhe Punët e Jashtme, Igli Hasani në fjalën e tij në Kuvend, ku edhe po diskutohet në parim edhe projektligji “Për buxhetin e vitit 2025”, tha se buxheti i Ministrisë për Evropën dhe Punët e Jashtme për vitin 2025 arrin në shifrat e 3.8 miliardë lekëve dhe është më i madhi i alokuar ndonjëherë për shërbimin e jashtëm.
Hasani nënvizoi se viti 2025 pritet të paraqesë sfida të reja për politikën e jashtme.
“MEPJ ka përfituar një projektbuxhet prej 3.8 miliardë lekësh. Buxheti më i lartë që është përfituar ndonjëherë për shërbimin e jashtëm”- tha Hasani.
Sipas ministrit një ndër objektivat kryesore është avancimi i procesit të integrimit në BE, me qëllim anëtarësimin e plotë të Shqipërisë në 2030 përmes reformave në institucione dhe proceseve.
Kryediplomati po ashtu renditi edhe një sërë objektivash të tjerë për vitin 2025.
“Pjesëmarrje aktive në nismat rajonale si Procesi i Berlinit; Ruajtjen e profilit të Shqipërisë në fushën e multikulturalizmit; Thellimin e marrëdhënieve me partneret strategjikë si SHBA dhe BE; Si dhe rritjen e bashkëpunimit me partneret tanë si NATO për të forcuar sigurinë; Forcimin e diplomacisë ekonomike; Rritjen e rolit të diasporës; Dhe mbështesje për Kosovën dhe përmirësim të infrastrukturës diplomatike”- tha ministri.
Hasani nënvizoi se ky projektbuxhet është një hap i rëndësishëm për të mbështetur angazhimet e vendit në politikën e Jashtme.
“Mendoj se ky projektbuxhet është një hap i rëndësishëm për të mbështetur angazhimet tona ndërkombëtare dhe për të siguruar që Shqipëria të jetë një aktor i fuqishëm në rajon dhe në botë me ndikim në procese kyçe”- tha Hasani.
Hasani tha se buxheti 2025 është rritur me 635 milionë lekë, ose 20% më shumë krahasuar me buxhetin aktual. Kjo sipas ministrit, është dëshmia e angazhimit për të konsoliduar rolin e demokracisë dhe politikës së jashtme.
“Projektbuxheti për shërbimin e jashtëm parashikon një rritje të konsiderueshme, janë 635 milionë lekë rritje, që është 20% më shumë se viti aktual, se viti 2024. Kjo është dëshmi e angazhimit të palëkundur të qeverisë shqiptare për të konsoliduar rolin e diplomacisë në shërbim të interesave të vendit dhe në përmbushje të qëllimeve të politikës së jashtme”, tha Hasani.
Kryediplomati nënvizoi se Shqipëria ka një plan të qartë, për të anëtarësuar vendin në BE në 2030, për të cilin tha se “është objektiv ambicioz, por i realizueshëm”.
“Viti 2025 do të jetë një vit i vendimmarrje për Shqipërinë dhe ne jemi të angazhuar ta shfrytëzojmë për të arritur progres të konsiderueshme në rrugën drejt BE-së. Bisedimet me partnerët tanë do të forcojnë lidhjen e Shqipërisë me familjet evropiane”- tha Hasani.
