Grupi parlamentar i Partisë Demokratike do të mblidhet sot në orën 12:00 në selinë qendrore të partisë, në një takim kyç për situatën në Këshillin Bashkiak të Tiranës.
Kjo mbledhje zhvillohet vetëm pak orë para se Këshilli Bashkiak të nisë seancën ku pritet të diskutohet dhe vendoset për shkarkimin apo jo të kryebashkiakut Erion Veliaj.
Në takim do të diskutohet edhe pozicioni i PD-së në Këshill, edhe pse demokratët kanë shprehur publikisht mbështetjen për praninë e Veliajt në seancë dhe qëndrimin e tyre pro shkarkimit.
Mbledhja e sotme pritet të japë drejtimet për qëndrimin zyrtar të grupit parlamentar në këtë proces të rëndësishëm politik.
Këshilli Bashkiak do të mblidhet sot për të propozuar shkarkimin e kryetarit të Bashkisë së kryeqytetit, Erion Veliaj.
Prej miratimit të ndarjes së re territoriale dhe ligjit për vetëqeverisjen vendore, ky është rasti i parë që këshilltarët do t’i propozojnë qeverisë shkarkimin e një kryetari bashkie.
Në orën 10:00 u mblodh Komisioni i Çështjeve Ligjore dhe Drejtësisë Sociale, i cili do të shqyrtojë kërkesën e anëtarëve socialistë të Këshillit Bashkiak.
Kërkesa, e firmosur nga grupi i këshilltarëve të mazhorancës vendos si motiv për shkarkimin nenin 62 të ligjit “Për Vetëqeverisjen Vendore”, ku thuhet: “Kryetari i bashkisë shkarkohet me vendim të Këshillit të Ministrave kur: propozohet për shkarkim nga Këshilli Bashkiak përkatës për mosparaqitje në detyrë për një periudhë 3-mujore të pandërprerë”.
Këshilltarët argumentojnë se prej datës 10 shkurt që Erion Veliaj është arrestuar, kryeqyteti nuk ka kryetarin e zgjedhur dhe Tirana ka nevojë për një kryetar në detyrë, për ndjekjen e punëve.
Pasi kërkesa të votohet në komision, në orën 16:00 do të mblidhet Këshilli Bashkiak për të vendosur fatin e Veliajt. Ende është e paqartë nëse vetë Veliaj do të arrijë të sigurojë leje nga prokurori për të dalë nga burgu e për të marrë pjesë në mbledhjen e Këshillit.
