Sipas gazetës britanike Financial Times, qeveria e re laburiste në Britani pritet të njoftojë këtë muaj një skemë të re për futur kartat digjitale të identifikimit, me qëllim të luftimit dhe reduktimit të emigracionit ilegal. Një nga propozimet është që çdo shtetas britanik dhe ata që kanë të drejtën e qëndrimit të marrin këto karta, duke legalizuar statusin e tyre. Ndryshe nga shtetasit e vendeve të tjera evropiane, britanikët nuk disponojnë karta identiteti, përveç pasaportave.
Ish-kryeministri Toni Bler kishte provuar më parë të implementonte një sistem të ngjashëm në fillim të viteve 2000, por kjo përpjekje dështoi. Tani, karta digjitale do të përdoret për të kontrolluar emigrimin, duke i ndihmuar autoritetet në verifikimin e statusit të emigrantëve shqiptarë dhe të tjerë që jetojnë dhe punojnë ilegalisht në Britani. Këto kontrollime do të prekin aspekte të ndryshme të jetës, si e drejta për të punuar, për të marrë një banesë me qira, dhe për shërbime shëndetësore.
Një problem i mundshëm është përdorimi i kartave të identitetit fals nga të huajt që jetojnë ilegalisht, një fenomen është i përhapur, përfshirë shqiptarët dhe emigrantët e tjerë. Kryeministri Starmer ka theksuar se këto karta do të ndihmojnë në pakësimin e Britanisë si një destinacion për emigrantët që tentojnë të jetojnë dhe punojnë ilegalisht. Një sondazh i Financial Times tregon se 53% e britanikëve mbështesin idenë e identifikimit digjital, ndërsa 20% janë kundër.
Më herët gjatë këtij viti, Britania gjithashtu njoftoi se do të krijojë një aplikacion qeveritar, që do t’u lejojë britanikëve të aksesojnë mijëra shërbime publike përmes smartphonëve, një model i ngjashëm me sistemin e-e-Albania në Shqipëri. Ky është një hap tjetër drejt modernizimit të shërbimeve publike dhe një përpjekje për të rritur efikasitetin në administratën shtetërore.
