Në mbrëmjen e së premtes, Kryeministrja e Estonisë, Kristen Michal, njoftoi se qeveria i kërkoi NATO-s konsultime në kuadër të Nenit 4 të traktatit, pasi tre avionë luftarakë rusë MiG-31 shkelën hapësirën ajrore estoneze. Avionët u detyruan të largoheshin nga patrullat ajrore të NATO-s, të kryera nga avionë italianë F-35.
Ministri i Jashtëm, Margus Tsahkna, tha se avionët rusë qëndruan mbi Gjirin e Finlandës për 12 minuta, pa komunikim me kontrollin ajror dhe pa plan fluturimi. Ai e cilësoi incidentin si akt të paprecedentë, duke kujtuar katër shkelje të tjera të ngjashme nga Rusia vetëm këtë vit.
NATO e përshkroi ngjarjen si “sjellje të pakujdesshme ruse” dhe bëri të ditur se Këshilli i Atlantikut të Veriut do të mblidhet javën e ardhshme për ta shqyrtuar rastin.
Presidenti amerikan Donald Trump shprehu shqetësimin për incidentin, ndërsa udhëheqës të BE-së si Kaja Kallas dhe Ursula von der Leyen e dënuan menjëherë shkeljen. Nga ana e saj, Rusia nuk dha komente.
Incidenti pason raste të ngjashme në Poloni dhe Rumani, duke u parë si një përpjekje e Moskës për të testuar gatishmërinë e aleancës dhe për të shpërqendruar NATO-n nga mbështetja ndaj Ukrainës.
