Regjistrimet për akomodimin në godinën nr. 3 të Qytetit Studenti u shoqëruan me tensione dhe përplasje mes studentëve dhe forcave të policisë. Fluksi i lartë i aplikimeve dhe numri i kufizuar i dhomave shkaktuan pakënaqësi, ndërsa studentët akuzuan institucionin për mungesë transparence në përzgjedhje.
Në një video të publikuar nga se fundmi shihet dhuna e Policisë së shtetit ndaj disa studentëve që kërkojnë një mundësi për të jetuar në këto konvikte.
Pas orëve të tëra pritje deri në orën 3 të mëngjesit, ku një pjesë e studentëve kishin shpresuar për të gjetur një dhomë, ata u dëbuan me dhunë, pa u dhënë asnjë sqarim dhe pa mundësi për të diskutuar vendimin.
Sipas njoftimit zyrtar, rreth 300 aplikantë u paraqitën për vetëm 30 dhoma dyshe të disponueshme. Studentët pretendojnë se vetëm një pjesë e vogël u lejua të regjistrohej, ndërsa të tjerët mbetën jashtë.
Rezidenca Studentore sqaroi se regjistrimet janë të hapura edhe në godina të tjera, por godina nr. 3 ishte më e kërkuara për shkak të kushteve të përmirësuara.
