Lideri demokrat Sali Berisha shprehu bindjen se administrata e ardhshme amerikane do të rishikojë vendimin për shpalljen e tij “non grata”, të cilin e cilësoi si një akt të motivuar nga grupime anti-demokratike.
Në emisionin “Log” të gazetarit Endri Xhafo në News24, Berisha vlerësoi qëndrimet e Donald Trump në mbrojtje të lirive dhe kundër censurës, duke theksuar se ky fenomen po fitonte terren jo vetëm në SHBA, por edhe në vende të tjera. “Donald Trump ka folur më shumë se kushdo tjetër për lirinë dhe kundër censurës, e cila po përhapet si një vello e zezë,” tha Berisha.
Ai shtoi se administrata e re nuk do të tolerojë praktika korruptive ndaj forcave demokratike në Europë dhe në botë, duke premtuar një rikthim të standardeve të reja të lirisë.
Sipas Berishës, reformat që pritet të ndërmarrë Qeveria e Trump do të luftojnë ndikimet e ekstremit të majtë, të cilat, sipas tij, kanë shkaktuar deformime në drejtësi. Ai solli si shembull prokurorë dhe gjyqtarë që, sipas tij, kanë abuzuar me pushtetin në dëm të Trump dhe mbështetësve të tij.
“Këto modele u eksportuan edhe në Tiranë, por dështuan. Prokurorët dhe gjyqtarët që vepronin sipas agjendës së George Soros u mundën nga rivalët e tyre,” tha Berisha.
