Ka përfunduar Konferenca e Kryetarëve e cila u zhvillua paraditen e kësaj të mërkure në ambientet e Kryesisë së Kuvendit. Kryetari i Grupit Parlamentar të Partisë Demokratike, Gazment Bardhi, së bashku me aleatin e tij, Tedi Blushin kërkuan debat pa limit kohor.
Mirëpo, kjo kërkesë e tyre u hodh poshtë dhe u vendos që secili nga 140 deputetët të ketë 10 minuta kohë për diskutim.
Sakaq, mësohet se ditën e nesërme, deputetët të rikthehen sërish në ulëset e Parlamentit ku dhe pritet prezantimi i programit qeverisë nga Edi Rama si dhe betimi i ministrave të tij.
Seanca do të vijojë edhe përgjatë ditës së premte, por ndryshe nga herët e kaluara nuk pritet të jetë maratonë, ku dhe do të ketë ndërprerje të herë pas hershme.
Kryeministri Edi Rama pritet që të prezantojë ditën e nesërme edhe programin qeverisës, ku do të sjellë sërish në vëmendje pikat e prezantuara gjatë fushatës elektorale, ku thelbi është tek anëtarësimi i Shqipërisë në Bashkimin Europian.
