Forcat e Mbrojtjes së Izraelit (IDF) kanë nisur një ofensivë të re tokësore në qytetin e Gazës, në përpjekje për të goditur struktura të reja të Hamasit dhe për të kapur udhëheqësin e ri të krahut ushtarak të organizatës, al-Khandad.
Sipas pamjeve të publikuara nga ushtria izraelite, njësitë e Divizionit të 98-të janë futur në qytetin e Gazës, të mbështetura nga forcat ajrore dhe marina izraelite. Ushtria deklaroi se gjatë operacionit janë goditur dhjetëra objekte të konsideruara si “infrastrukturë terroriste”, përfshirë ndërtesa të minuar dhe poste vëzhgimi të Hamasit.
Operacioni ka hyrë në një fazë më agresive, me IDF që konfirmon se Divizioni i 98-të ka marrë kontrollin e zonave urbane, ndërsa Divizioni i 162-të operon në periferi. Në ditët në vijim pritet t’i bashkohet edhe Divizioni i 36-të.
Kthimi i pengjeve, “detyrë kombëtare dhe morale”
Kreu i shtabit të përgjithshëm të ushtrisë izraelite, gjeneral Eyal Zamir, deklaroi se kthimi i pengjeve të mbajtura nga Hamasi mbetet prioritet absolut i ofensivës.
“Kthimi i pengjeve është një detyrë kombëtare dhe një përgjegjësi morale,” – theksoi ai.
Zamir tha se operacioni po kryhet përmes një kombinimi të forcave tokësore, goditjeve precize dhe informacionit të saktë inteligjent. Ai shtoi se Hamasi ka pësuar humbje të mëdha:
“Kemi shkatërruar pjesën më të madhe të kapaciteteve ushtarake të Hamasit. Tani po konsolidojmë këto arritje për të sjellë fundin e luftës më afër.”
Ai gjithashtu u shpreh se operacioni zhvillohet në përputhje me të drejtën ndërkombëtare, me përpjekje për të minimizuar viktimat civile.
Reagime ndërkombëtare: Frikë për përkeqësim të krizës humanitare
Ndërkohë, liderë evropianë kanë shprehur shqetësim për ndikimin e ofensivës në civilët palestinezë. Shefja e diplomacisë së BE-së, Kaja Kallas, paralajmëroi se operacioni izraelit rrezikon të përkeqësojë krizën humanitare në Gaza.
“Do të shkaktojë më shumë vdekje, shkatërrim dhe zhvendosje të civilëve,” – tha Kallas.
Bashkimi Evropian pritet të shpallë të mërkurën masa të reja presioni ndaj qeverisë izraelite, në përpjekje për të ndalur përshkallëzimin.
Edhe Egjipti reagoi ashpër, duke paralajmëruar se rajoni ndodhet në prag të “një faze të re të kaosit të plotë” për shkak të “arrogancës dhe sjelljes së pamatur të Izraelit”. Ministria e Jashtme egjiptiane kritikoi gjithashtu komunitetin ndërkombëtar për “qëndrimin pasiv ndaj asaj që e cilësoi si krime të gjenocidit”.
