Fermerët në fshatrat e Fierit dhe Roskovecit po përballen me një krizë të thellë ekonomike pas një sezoni të vështirë për kultivuesit e bostanit, veçanërisht shalqinjve. Mungesa e tregut dhe çmimet jashtëzakonisht të ulëta kanë shkaktuar humbje të mëdha, me dhjetëra hektarë të mbjella që mbeten pa u vjelë.
Gëzim Buzi, një fermer nga Kallmi i Fierit, ka kultivuar tre hektarë me shalqi, por rreth 1,000 kuintal prodhim kanë mbetur në arë. Sipas tij, dëmi ekonomik arrin në 20 milion lekë të vjetra. Ai kritikon tregtarët, të cilët e blejnë shalqirin me 50 lekë të vjetra për kilogram, për ta shitur më pas me 250 lekë. “Shteti duhet të kontrollojë tregun dhe abuzimet me çmimet,” thotë Buzi.
Një situatë të ngjashme ka dhe Mehmet Malko nga Suk i Rroskovecit, që ka mbjellë pesë dynym me shalqi, por ka realizuar vetëm 1 milion lekë të vjetra. Ai shprehet se fitimi është aq i ulët sa nuk mbulon as kostot e plehrave. Malko thekson se vitin e kaluar u mboll shumë shalqi, por kërkesa nga tregu i huaj ka qenë e ulët, duke shkaktuar falimentimin e shumë fermerëve.
Të dhënat tregojnë se rreth 80% e prodhuesve në këtë zonë nuk kanë arritur të shesin asnjë frut këtë sezon. Fermerët kërkojnë ndërhyrjen e shtetit si një rregullator të tregut, për të parandaluar abuzimet dhe për të orientuar kultivuesit sipas nevojave reale. Malko sugjeron se çdo prodhues duhet të mbajë përgjegjësi për produktin e tij dhe mënyrën e përdorimit të pesticideve, duke kërkuar që prodhimi të shitet vetëm me NIPT dhe nën kontroll të ngushtë nga autoritetet.
Këta fermerë paralajmërojnë se nëse nuk ndërmerren masa urgjente, shumë prej tyre do të detyrohen të heqin dorë nga kultura e shalqirit. Dëmet e mëdha po i shtyjnë drejt marrjes së kredive për të pastruar borxhet, duke thelluar më tej krizën ekonomike në këtë sektor.
