Një 29-vjeçar nga Maqedonia e Veriut është ndaluar në pikën kufitare të Qafë Thanës, pasi rezultoi i shpallur në kërkim ndërkombëtar nga autoritetet austriake për veprën penale “Trafikimi i narkotikëve”.
Shtetasi M. G., banues në Veleshtë, Maqedonia e Veriut, tentoi të dilte nga territori i Shqipërisë, por gjatë kontrolleve të imtësishme të Policisë Kufitare u konstatua se ndaj tij ishte lëshuar urdhër arresti ndërkombëtar nga Interpol Viena.
Nga verifikimet e kryera në bashkëpunim me partnerët austriakë, përmes Interpol Tiranës, u konfirmua se i riu ishte në kërkim për përfshirje në aktivitetin e trafikut të lëndëve narkotike.
Policia Kufitare arrestoi përkohësisht 29-vjeçarin, ndërsa Interpol Tirana vijon procedurat për ekstradimin e tij drejt Austrisë, ku do të përballet me drejtësinë.
