Policia greke ka vënë në pranga tre shtetas shqiptarë në Selanik, të moshës 39, 30 dhe 23 vjeç, të dyshuar si autorë të një vrasjeje të mbetur në tentativë vitin e kaluar.
Sipas mediave greke, identiteti i tyre nuk është bërë ende i ditur, ndërsa 39-vjeçari konsiderohet si udhëheqësi i grupit dhe është person i njohur për autoritetet.
Gjatë arrestimit, policia gjeti dhe sekuestroi armë të ndryshme, përfshirë kallashnikovë, pistoleta, detonatorë, silenciatorë, fishekë, si dhe 28 kilogramë hashash.
Hetimet kanë zbuluar se tre shqiptarët ishin të përfshirë në një ngjarje të ndodhur më 3 shtator 2024, ku 39-vjeçari hapi zjarr ndaj një 25-vjeçari grek, i cili mbeti i plagosur. Pas ngjarjes, autori u largua me makinë, duke u arratisur nga vendngjarja.
