Kërpudha rezistente ndaj barnave po përhapet me shpejtësi në spitalet evropiane, paralajmëron ECDC
Në një raport të fundit, Qendra Evropiane për Parandalimin dhe Kontrollin e Sëmundjeve (ECDC) ka njoftuar se kërpudha rezistente ndaj barnave, Candida auris (C. auris), po përhapet me ritme alarmante në spitalet e Evropës.
Autoritetet shëndetësore kërkojnë masa urgjente për ta mbajtur nën kontroll, pasi infeksionet që shkakton janë veçanërisht të rrezikshme për pacientët me probleme të tjera shëndetësore.
Sipas të dhënave, deri në vitin 2023 janë raportuar mbi 4,000 raste të C. auris në Bashkimin Evropian dhe vendet fqinje, duke treguar një rritje të ndjeshme me kalimin e viteve. Spanja, Greqia, Italia, Rumania dhe Gjermania përbëjnë vendet me numrin më të lartë të rasteve, ndërsa shpërthime të fundit janë regjistruar edhe në Qipro e Francë. Në total, nga viti 2013 deri në 2023, kërpudha është identifikuar në 18 vende evropiane.
Diamantis Plachouras, drejtues i ekipit për rezistencën ndaj antimykotikëve në ECDC, theksoi se në disa zona të Evropës, C. auris është bërë pothuajse endemike në spitalet. Ai shtoi se numri real i rasteve mund të jetë edhe më i lartë, pasi nga 36 vendet e përfshira në raport, vetëm 17 kanë programe mbikëqyrjeje dhe vetëm 15 zbatojnë udhëzime të posaçme për parandalimin dhe kontrollin e infeksioneve.
Kërpudha është veçanërisht e vështirë për t’u frenuar për shkak të aftësisë së saj për të mbijetuar në sipërfaqe dhe pajisje mjekësore, si dhe për t’u transmetuar shpejt midis pacientëve. Testimi laboratorik shihet si mënyra më efektive për të zbuluar shpërthimet.
Candida auris u identifikua për herë të parë në Japoni më 2009 dhe prej atëherë është përhapur në shumë vende, shpesh përmes pacientëve të hospitalizuar që e bartin me vete nga spitalet ku kjo kërpudhë është e pranishme.
ECDC apelon për rritjen e kapaciteteve të diagnostikimit dhe kontrollit, duke e cilësuar përhapjen e C. auris si një kërcënim serioz për sigurinë e pacientëve në spitalet evropiane.
