Kombëtarja e Serbisë u turpërua 0-5 nga Anglia mbrëmjen e të martës në stadiumin “Rajko Mitic” të Beogradit, në sfidën e vlefshme për Grupin K të kualifikueseve të Kupës së Botës 2026. Por humbja e thellë nuk ishte i vetmi lajm: në qendër të vëmendjes doli edhe sjellja skandaloze e tifozëve serbë.
Përtej rezultatit, atmosfera u ndez nga tensioni dhe dhuna. Huliganët e të dyja palëve u përplasën jashtë stadiumit, ndërsa brenda pati përleshje mes vetë tifozëve serbë, një kamp mbështetës i presidentit Vuçiç dhe tjetri kundërshtar i tij. Në tribuna u shfaqën pankarta nacionaliste si “Kosova është Serbi”, harta të Kosovës të mbuluara me ngjyrat serbe dhe kor kolektiv me mesazhe anti-shqiptare.
Ironia qëndron se ndeshja u luajt në një stadium pjesërisht të mbyllur, si ndëshkim për thirrjet raciste në ndeshjen me Andorrën, ndërsa vetë Federata Serbe e Futbollit kishte paralajmëruar tifozët të silleshin me qytetari, duke kujtuar se në pesë vitet e fundit janë gjobitur mbi 700 mijë euro nga UEFA dhe FIFA. Por apelet u injoruan. Sipas raportimeve, arbitri francez Clement Turpin dhe delegati i takimit kanë shënuar të gjitha incidentet dhe dosja do të shkojë përpara Komisioneve të Disiplinës në FIFA.
Me këtë përsëritje të thirrjeve diskriminuese kundër Kosovës, Serbia rrezikon një dënim të rëndë, përballja e 11 tetorit në Beograd ndaj Shqipërisë mund të luhet me kapacitet të reduktuar ose, në skenarin ekstrem, pa tifozë fare. Një skenar që do t’i shkonte për shtat kuqezinjve të Sylvinhos, pasi kjo ndeshje pritet të jetë një “finale” për fatet e Grupit K në garën drejt Botërorit 2026.
