Kompania amerikane Chevron ka shprehur interesin për të marrë pjesë në tenderin ndërkombëtar të organizuar nga Greqia për eksplorimin dhe shfrytëzimin e hidrokarbureve në katër blloqe detare në jug të Kretës dhe Peloponezit. Ky zhvillim ka një rëndësi të veçantë për Greqinë, duke theksuar jo vetëm dimensionet energjetike dhe ekonomike, por edhe forcimin e të drejtave sovrane të vendit në një zonë që është historikisht e kontestuar nga Turqia.
Ministri grek i Mjedisit dhe Energjisë, Stavros Papastavrou, e përshkroi këtë moment si një shpresë për të ardhmen e vendit dhe një mundësi për të shfrytëzuar pasuritë energjetike që ndodhen nën ujë. Ai theksoi se pjesëmarrja e Chevron-it, së bashku me Helleniq Energy, shënon fillimin e një kapitulli të ri në eksplorimin e burimeve energjetike të Greqisë. Papastavrou theksoi se qeveria e kryeministrit Kyriakos Mitsotakis është e angazhuar për të forcuar sigurinë energjetike të vendit, me qëllimin për ta bërë Greqinë më tërheqëse për investitorët dhe më të fuqishme në skenën gjeopolitike.
Interesi i Chevron-it për blloqet detar në jug të Kretës përfundimisht është interpretuar si një sinjal i qartë se burimet energjetike greke po tërheqin vëmendjen e tregjeve ndërkombëtare. Mediat greke theksojnë se ky hap mund të ndihmojë në shndërrimin e Greqisë në një nyje strategjike energjetike në rajon, duke kontribuar gjithashtu në forcimin e pozitës së saj në Mesdheun Lindor.
Kjo zhvillim është një hap konkret drejt realizimit të ambicies së Greqisë për vetë-mjaftueshmëri energjetike dhe po ashtu një mënyrë për të forcuar pozitat e saj në një situatë politike komplekse në rajon. Pjesëmarrja e kompanive të mëdha energjetike si Chevron ofron një perspektivë optimiste për të ardhmen energjetike të vendit, duke synuar një stabilitet më të madh ekonomik dhe një rol më të fortë në balancën gjeopolitike të rajonit.
