Mashtrimet kibernetike dhe në rrjetet sociale janë kthyer në një trend që gjeneron miliona euro përfitime, por edhe një punë e vështirë për autoritetet për t’i gjurmuar, parandaluar dhe njëkohësisht këshilluar qytetarët që të mos bien pre.
Prindërve dhe të rinjve u është kërkuar të jenë të kujdesshëm ndaj mashtrimeve “të punës” që po qarkullojnë së fundmi në mediat sociale dhe veçanërisht në Britaninë e Madhe, ku janë shtuar denoncimet, informon BBC.
Policia e Yorkshire tha se në gjashtë muajt e fundit kishte marrë 40 raportime për këto lloje mashtrimesh që vepronin në zonë. Policia tha se ato përfshijnë postime në mediat sociale që ofrojnë qindra paund në këmbim të pëlqimit ose ndarjes së përmbajtjes, dhe viktima më e re ishte vetëm 15 vjeç.
“Nëse hasni një ofertë të tillë, ju lutemi injorojeni atë, mos klikoni në asnjë lidhje që ofrojnë dhe definitivisht mos u dërgoni para”, tha Detektivja Janine Mitchell. Ajo shtoi: “Të rinjtë janë shumë të aftë në rrjetet sociale. Ata dëgjojnë se influencuesit mund të fitojnë para në internet, kështu që nëse kontaktohen nga mashtrues duke u thënë se kjo është një mënyrë për të fituar para, duket krejtësisht e realizueshme”.
Si funksionon mashtrimi dhe joshjet me TikTok
Ajo tha se viktimat raportuan se kishin marrë një mundësi pune, shpesh nëpërmjet Telegramit, nga një person që pretendonte të ishte nga ekipi i Burimeve Njerëzore i TikTok duke u ofruar atyre para për të pëlqyer dhe ndarë postimet në TikTok.
Pastaj ata u drejtuan në një numër WhatsApp ose në një link të dyshimtë dhe më vonë u thanë të dërgonin para, me premtimin e një rimbursimi në të ardhmen. Ata nuk morën kurrë asgjë pasi e bënë këtë.
Ky lloj aktiviteti është tregues i rrjeteve të “kontrabandistëve të parave” dhe mund të konsiderohet vepër penale, sipas Policisë së Yorkshire të Veriut. Kjo gjithashtu mund të çojë në mbylljen e llogarive bankare të viktimave.
“Mediat sociale janë të shkëlqyera kur përdoren në mënyrë legjitime, por për fat të keq përdoren edhe nga kriminelët që synojnë njerëz të pasigurt dhe të besueshëm.
“Ju lutem, jini gjithmonë në gatishmëri,” tha Detektivi Mitchell.
Por ky fenomen duket se është i përhapur edhe në vende të tjera, pasi ‘deep apo dark internet’ ua mundëson kundravajtësve që të operojnë pa frikë dhe të përfitojnë s më shumë me një hartë më të gjerë shtrirjeje, duke shfrytëzuar teknikat e kibernetikës.
