Pas kundërpërgjigjeve të kryeministrit Edi Rama, edhe ambasadori shqiptar në Mbretërinë e Bashkuar Uran Ferizi ka kundërshtuar deklaratat e Nigel Farage se “1 në 50 shqiptarë në Britani ndodhen në burg”. Ai ka mbajtur një takim me Farage gjatë një konference të partisë së tij “Reform UK”, ku Ferizi i ka thënë se po përsërit deklarata të pavërteta dhe të dëmshme për komunitetin shqiptar në Britani.
“Është një gënjeshtër e madhe dhe megjithatë po përsëritet në GB News dhe nga politikanë të ndryshëm,”, ka thënë Ferizi, duke shtuar se statistikat zyrtare po përdoren për të ndërtuar narrativa që nuk kanë lidhje me realitetin.
“I thashë atij se ishte thellësisht e padrejtë të përhapeshin këto gënjeshtra. Thjesht nuk janë të vërteta. Pata përshtypjen se ai ishte i hapur kur i dëgjoi dhe i kuptoi këto,” u shpreh Ferizi pas takimit me Farage.
Gjatë bisedës, ambasadori Ferizi vuri në pah gjithashtu rolin pozitiv të komunitetit shqiptar në Britani, duke i cilësuar ata si një shembull i mirë i integrimit dhe kontributit në shoqëri.
“I tregova gjithashtu se shqiptarët janë një shembull shumë i mirë i njerëzve që integrohen mirë në Britani. Punojnë shumë, mësojnë gjuhën, zakonet dhe rregullat e vendit. I thashë se ishte thellësisht e padrejtë për një vend që krenohet për drejtësinë, dhe më duket se ai e vlerësoi këtë,” ka deklaruar ambasadori shqiptar.
Deklarata e ambasadorit Ferizi erdhi në të njëjtën ditë kur Farage njoftoi se kishte planifikuar një drekë me kryeministrin Edi Rama, për të diskutuar çështjen e dëbimit të të burgosurve shqiptarë nga Britania. Në një deklaratë provokuese, Farage tha se mund të rezervonte një avion të madh për të marrë me vete sa më shumë të burgosur shqiptarë kur të vizitonte Shqipërinë.
Në fillim të muajit Korrik, kryeministri Rama dhe Farage u përfshinë në një diskutim publik mbi raportin e raportin e shqiptarëve të burgosur në Britani me numrin total të tyre të territorin britanik. Farage pretendonte se 1 në 50 shqiptarë në Britani është i burgosur, deklaratë që u kundërshtua nga Rama.
