Të paktën njëmbëdhjetë njerëz u plagosën pasi një avion i ‘Lufthansa’ gjatë fluturimit nga Buenos Aires në Frankfurt u godit nga turbulenca të forta ndërsa ishte mbi Atlantik.
“Fatkeqësisht, pesë pasagjerë dhe gjashtë anëtarë të ekuipazhit pësuan lëndime të lehta”, tha një zëdhënës i Lufthansa për Reuters.
“Siguria e fluturimit nuk u rrezikua në asnjë moment”, shtoi zëdhënësi.
Të plagosurit morën trajtim mjekësor menjëherë pasi avioni u ul i sigurt në destinacionin e planifikuar në orën 10:53 të mëngjesit të sotëm, sipas linjës ajrore.
Boeing 747-8 kishte 329 pasagjerë dhe 19 anëtarë të ekuipazhit.
Po ashtu kompania tha se turbulenca ishte e shkurtër dhe ndodhi në një zonë konvergjence intratropikale.
