Një ngjarje tragjike ka tronditur opinionin publik. Kreshnik Tomai, 35-vjeçari nga Fieri dhe babai i tre fëmijëve, ka ndërruar jetë më 3 shtator në Spitalin e Traumës në Tiranë, pas 10 ditësh në koma. Ai u përplas nga një automjet më 24 gusht pranë Shkollës së Muzikës në Fier, ndërsa po kalonte rrugën.
Përplasja fatale u shkaktua nga një 17-vjeçar që drejtonte një “Range Rover” pa leje drejtimi. I riu u arrestua nga policia dhe ndaj tij rëndojnë akuzat për “shkelje të rregullave të qarkullimit rrugor” dhe “drejtim të mjetit në mënyrë të parregullt”.
Kreshnik Tomai nuk ishte një emër i panjohur për publikun. Ai u bë i njohur si babai i Nikitës, vogëlushes 10-vjeçare me një talent të veçantë për muzikën. Në mediat shqiptare dhe në rrjetet sociale, ai u shfaq krah vajzës së tij, duke e mbështetur pa kushte në ëndrrën për t’u bërë këngëtare.
Në intervista të shumta televizive, Kreshniku kishte shprehur publikisht përkushtimin dhe dashurinë për Nikitën, duke thënë:
“Fëmijën e parë e kam dashur vajzë dhe emrin ja kam vënë vetë. Nuk i imponoj, të zgjedhin çfarë të duan. Është ëndrra e saj dhe unë do përpiqem t’ia plotësoj.”
Bashkë me vajzën, ishin aktivë edhe në “TikTok”, ku ndanin momente nga jeta e përditshme dhe video muzikore që preknin zemrat e ndjekësve.
Lajmi për ndarjen nga jeta të Kreshnikut ka sjellë një valë reagimesh në rrjet, ndërsa shumë qytetarë kanë shprehur ngushëllimet për familjen, veçanërisht për vajzën e tij, Nikitën, që humbi jo vetëm babain, por edhe mbështetësin më të madh të ëndrrës së saj.
Ngjarja tragjike ka rikthyer edhe një herë në vëmendje problematikën e drejtimit të automjeteve nga të mitur pa leje drejtimi, me pasoja të rënda për jetën.
