Shqipëria do të luajë sot ndeshjen e parë miqësore ndaj Gjibraltarit, në kuadër të përgatitjeve për ndeshjen e rëndësishme të 9 shtatorit kundër Letonisë, e vlefshme për eliminatoret e Kampionatit Europian. Ky takim do t’i shërbejë stafit teknik të trajnerit Silvinjo për të vlerësuar gjendjen e lojtarëve dhe për të bërë përgatitjet e fundit para ndeshjes që do të zhvillohet në “Air Albania” pas pak ditësh.
Ndërkohë që vëmendja është kryesisht tek takimi i ardhshëm me Letoninë, kjo miqësore ka një rëndësi të veçantë për trajnerin, i cili pritet të provojë lojtarë që mund të mos kenë pasur mundësi të luajnë deri tani, për të parë se kush është i gatshëm për sfidën e datës 9 shtator.
Pas mbylljes së stërvitjes në Malaga të Spanjës, ku ekipi ka finalizuar përgatitjet e tij, trajneri Silvinjo ka përcaktuar formacionin dhe lojtarët që do të marrin pjesë në këtë ndeshje.
Formacioni i mundshëm:
Strakosha do të jetë sërish portier, duke ruajtur besimin për të kaluar një moment të shkëlqyer te ekipi i tij në Greqi. Edhe Mario Dajsinani mund të marrë minuta, pas një periudhe pa shumë mundësi për t’u aktivizuar.
Në mbrojtje, Kumbulla dhe Gjimshiti do të formojnë çiftin e qendrës, ndërsa Balliu dhe Aliji do të mbulojnë krahët. Në mesfushë, Berisha, Shehu dhe Asllani pritet të luajnë rol kyç në lidhjen e mesfushës me sulmin, ku Daku do të jetë në qendër të ofensivës, me Bajramin dhe Hoxhën në krahë.
Ky është takimi i parë historik për Shqipërinë kundër Gjibraltarit, pasi dy ekipet nuk janë përballur kurrë më parë. Ndeshja do të zhvillohet në stadiumin “Europa Point” në Gjibraltar dhe do të nisë në orën 18:00.
