Vendi ynë do të ndikohet nga kushte atmosferike të paqëndrueshme, çka do të sjellë një mot të luhatshëm gjatë gjithë ditës.
Qielli do të paraqitet me kthjellime të herëpashershme dhe vranësira mesatare deri të dendura, të cilat do të shtohen sidomos nga mesdita dhe pasditja. Vranësirat pritet të shoqërohen me reshje shiu të dobëta dhe lokale në pjesën më të madhe të territorit, ndërsa në zonat malore reshjet, në intervale të shkurtra, mund të marrin formën e shtrëngatave. Pas pasdites, reshjet do të kufizohen kryesisht në relievet malore dhe më vonë do të ndërpriten gradualisht.
Era do të fryjë nga juglindja në veriperëndim me shpejtësi mesatare rreth 8 m/s, ndërsa në bregdetin jugperëndimor dhe në lugina mund të arrijë deri në 13 m/s. Kushtet në det parashikohen me dallgëzim të lehtë deri mesatar, me forcë 1–3 ballë.
Temperaturat do të variojnë nga 14°C minimalja deri në 30°C maksimalja.
