Jahti luksoz, i vlerësuar në vlerën 700 mijë paund u fundos vetëm 15 minuta pasi ishte lëshuar në det në brigjet e Zonguldakut, në veri të Turqisë.
Fillimisht lëshimi i tij në det dukej i suksesshëm, por kjo zgjati vetëm pak pasi jahti filloi të anohej rrezikshëm. Personat që ishin në bord i “mbërtheu” paniku, teksa jahti vazhdonte të humbiste ekuilibrin deri në momentin që u fundos plotësisht.
Sipas raportimeve të mediave të huaja jahti ishte 24 deri në 30 metra i gjatë, ndërtuar në kantierin Med Yilmaz Shipyard dhe i dorëzuar së fundmi pronarit nga Stambolli.
Nuk pati asnjë humbje jete dhe personat që ishin në ekuipazh arritën të dilnin në breg me not. Ndërkohë kantieri ku u ndërtua mjeti njoftoi se do të kryhet një hetim për të zbuluar shkakun e incidentit.
