Ali Larijani, Shefi i Sigurisë i Iranit dhe sekretar i Këshillit të Lartë të Sigurisë Kombëtare, ka shprehur gatishmërinë e Tehranit për të biseduar me Shtetet e Bashkuara në lidhje me programin bërthamor, duke theksuar se rruga për negociata nuk është mbyllur. Ai akuzoi amerikën që vetëm flasin për negociata pa u angazhuar në bisedime serioze dhe e kritikoi vendosjen e kushteve të papranueshme, si limitet në programin raketor iranian, duke e cilësuar këtë si pengesë për bisedimet.
Deklaratat e Larijanit erdhën vetëm disa ditë pas një vendimi nga fuqitë evropiane për të rikthyer sanksionet e Kombeve të Bashkuara ndaj Iranit, ndërsa administrata amerikane shprehu gatishmërinë për t’u angazhuar në bisedime direkte. Bisedimet bërthamore midis Teheranit dhe Washingtonit, që kishin nisur në prill, u ndërprenë në qershor pas sulmeve nga Izraeli dhe Shtetet e Bashkuara ndaj objekteve bërthamore iraniane.
Javën e kaluar, Britania, Franca dhe Gjermania aktivizuan mekanizmin e sanksioneve të OKB-së, një procedurë paraparë në marrëveshjen bërthamore të vitit 2015, e cila lejon rikthimin automatik të sanksioneve në rast të mosrespektimit të marrëveshjes. Sekretari amerikan i Shtetit, Marco Rubio, theksoi se SHBA-ja qëndron e angazhuar për një zgjidhje të qëndrueshme dhe se ky mekanizëm i aktivizuar forcon, përkundrazi, mundësitë për diplomaci.
Pas këtyre sulmeve, Irani ndaloi bashkëpunimin me agjencinë bërthamore të OKB-së dhe kërkoi garanci për të shmangur veprime ushtarake përpara rifillimit të negociatave. Qeveritë perëndimore e shohin programin raketor të Iranit si një kërcënim të mundshëm për stabilitetin rajonal dhe kanë kërkuar një “marrëveshje gjithëpërfshirëse” që do të përfshinte gjithashtu ambiciet rajonale të Iranit. Megjithatë, Teherani vazhdon të theksojë se programet e tij ushtarake nuk do të negociohen, duke mohuar gjithashtu akuzat për synimin e krijimit të armëve bërthamore.
