Homazhet për regjisorin e njohur shqiptar Dhimitër Anagnosti u zhvilluan në Hollin e Teatrit të Operës dhe Baletit, ku morën pjesë familjarë, kolegë dhe qytetarë. Anagnosti u nda nga jeta në moshën 89-vjeçare, duke lënë pas një trashëgimi të madhe në kinematografinë shqiptare. Ai lindi më 23 janar 1936 në Vuno dhe ishte një nga regjisorët më të rëndësishëm të shekullit XX në Shqipëri.
Pas përfundimit të shkollës fillore në vendlindje dhe të mesme në Vlorë, Anagnosti ndoqi Institutin Kinematografik “VGIK” në Moskë, ku u diplomua për kinooperator. Bashkë me Viktor Gjikën realizoi filmin “Njeriu kurrë nuk vdes”, i cili u shpërblye me Çmimin e Parë në Festivalin Botëror të Shkollave Kinematografike në Holandë në vitin 1961.
Karriera e tij profesionale filloi në vitin 1961 me filmin “Debatik” dhe vijoi me për projekete të ndryshme, përfshirë filmin e parë dokumentar me ngjyra “Gurët dekorativë”. Si regjisor, Anagnosti realizoi 14 filma artistikë dhe 10 dokumentarë gjatë 40 viteve të karrierës së tij, duke fituar çmime të shumta kombëtare dhe ndërkombëtare. Ai ishte gjithashtu autor i 15 skenarëve, me shumicën e filmave të tij të shkruar prej tij.
Një nga karakteristikat e tij më të dukshme ishte guximi për t’u shprehur hapur dhe mbrojtja e pikëpamjeve të tij, për të cilat shpesh përballej me kritika. Anagnosti ishte i nderuar me titullin “Artist i Popullit” në vitin 1987 dhe me çmimin e karrierës në Festivalin e 10-të të Filmit Shqiptar. Në vitin 1991, ai u angazhua në politikë si deputet i Partisë Demokratike dhe më pas shërbeu si ministër i Kulturës, Rinisë dhe Sporteve.
Në vitin 2001, Anagnosti solli dramën e tij të vetme në skenë, ndërsa në vitin 2005 prezantoi filmin e tij të fundit, “Gjoleka, djali i Abazit”, i cili fitoi dy çmime ndërkombëtare. Ai ishte i martuar me aktoren e njohur Roza Anagnosti, e cila gjithashtu la gjurmë në skenën shqiptare. Dhimitër Anagnosti do të mbetet gjithmonë një figurë e rëndësishme në historinë e artit shqiptar.
