Ankesa, rinumërime dhe beteja në Komisionin e Ankesave dhe në Kolegjin Zgjedhor.
Përpjekjet e opozitës për të shpallur 11 majin si farsë elektorale dhe për të përsëritur zgjedhjet, nuk patën sukses në shkallët e gjyqësorit, por ato shtynë certifikimin final të zgjedhjeve parlamentare.
E kur demokratët i mbaruan përballjet e tyre, një konflikt tjetër lindi, në koalicionin më të ri opozitar, duke krijuar një vorbull të re.
Konfliktet mes Adriatik Lapajt dhe Endri Shabanit, futën situatën në një spirale ende të pazgjidhur, se kush duhet të gëzojë statusin e deputetit të vetëm të arritur nga koalicioni “Nisma Shqipëria Bëhet”.
Sipas marrëveshjes paraprake, të gjithë emrat e listës së mbyllur do të dorëzonin mandatin dhe në Kuvend do të hynte më i votuari i listës së hapur, në këtë rast, kryetari Adriatik Lapaj.
Por rrugës një i afërm i Shabanit, Zeqir Kordhoni, i 9-ti në listë tha se nuk do të dorëhiqej, duke i bllokuar Lapajt, rrugën për në parlament. Në këtë ngërç, kushërira e Lapajt, e 4-ta Kleana Xhuveli, po ashtu shpalli ambicien për të marrë mandatin.
Komisioneri Ilirjan Celibashi ja dha mandatin pikërisht të afërmes së Lapajt me numrin 4, duke njohur dorëheqjen në grup të 3 emrave të parë.
Por një vendim i Komisionit të Ankesave dhe Sanksioneve, e riktheu mandatin tek emri parë në listë, Ana Dajko, një 60 vjeçare nga Saranda, e kandiduar fiktivisht në listë.
Kolegji Zgjedhor do të vendosë të hënën se kush do të jetë në të vërtetë deputeti i vetëm i këtij grupimi.
Më pas, Komisioni Rregullator do të mblidhet për t’i vënë kapak procesit zgjedhor të 11 majit me certifikimin zyrtar.
