Palestinezët po ikin nga disa pjesë të qytetit të Gazës pasi ushtria izraelite filloi fazat e para të një ofensive tokësore të planifikuar, thonë zyrtarët në qytet, raporton BBC.
Sekretari i Përgjithshëm i OKB-së, António Guterres, ka ripërsëritur thirrjet për një armëpushim të menjëhershëm “për të shmangur vdekjen dhe shkatërrimin” që një sulm do të “shkaktonte në mënyrë të pashmangshme”.
Izraeli dëshiron të sinjalizojë se po ecën përpara me planin e tij për të pushtuar të gjithë qytetin e Gazës, pavarësisht kritikave ndërkombëtare.
Qindra palestinezë në lagjet Zeitoun dhe Sabra të qytetit të Gazës janë larguar drejt pjesës veriperëndimore të qytetit.
Një zëdhënës ushtarak tha se trupat tashmë po vepronin në zonat Zeitoun dhe Jabalia për të hedhur themelet për ofensivën, të cilën Ministri i Mbrojtjes, Israel Katz, e miratoi të martën dhe e cila do t’i paraqitet kabinetit të sigurisë më vonë këtë javë.
Rreth 60,000 rezervistë do të thirren në shërbim ushtarak në fillim të shtatorit.
Në një deklaratë, Hamasi akuzoi udhëheqësin izraelit për vazhdimin e një “lufte brutale kundër civilëve të pafajshëm në Qytetin e Gazës”.
Qindra mijëra palestinezë në Qytetin e Gazës pritet të marrin urdhër të evakuohen dhe të shkojnë në Gazën jugore, ndërsa fillojnë përgatitjet për planin e pushtimit të Izraelit.
Shumë nga aleatët e Izraelit e kanë dënuar planin e tij. Presidenti francez Emmanuel Macron paralajmëroi të mërkurën se ai “mund të çojë vetëm në katastrofë për të dy popujt dhe rrezikon ta zhytë të gjithë rajonin në një cikël lufte të përhershme”.
Ndërkohë, Komiteti Ndërkombëtar i Kryqit të Kuq (KNKK) tha se zhvendosja e mëtejshme dhe intensifikimi i armiqësive “rrezikojnë të përkeqësojnë një situatë tashmë katastrofike” për popullsinë 2.1 milionëshe të Gazës.
Qeveria e Izraelit njoftoi qëllimin e saj për të pushtuar të gjithë Rripin e Gazës, pasi bisedimet indirekte me Hamasin për një armëpushim dhe një marrëveshje për lirimin e pengjeve dështuan muajin e kaluar.
