Pas gati 10 orësh në mungesë të plotë kontakti, ish-zëvendësdrejtori i përgjithshëm i AKSHI-t, Daniel Shima, është rikthyer pranë familjes. Shkaqet që e shtynë atë të njoftonte partneren se po arrestohej dhe më pas të ndërpriste çdo komunikim mbeten ende të paqarta.
Ngjarja ndodhi mbrëmjen e 20 gushtit, kur familjarët humbën çdo lidhje me të dhe nëna e tij bëri një denoncim në Komisariatin nr. 1 në Tiranë rreth orës 17:00. Në mesazhin e fundit të dërguar partneres, Shima shkruante se “po e arrestonin”, çka shtoi shqetësimin dhe pasigurinë e të afërmve.
Policia e Shtetit ka nisur hetimet paraprake, duke sekuestruar pamjet nga kamerat e sigurisë në zonën ku dyshohej se ishte parë për herë të fundit. Aktualisht, po shqyrtohen disa pista për të zbardhur rrethanat e zhdukjes, përfshirë mundësinë e rrëmbimit apo të një inskenimi të qëllimshëm.
Hetimet janë në vijim, ndërsa autoritetet pritet të japin sqarime mbi arsyet që çuan në këtë ngjarje. Deri tani, Daniel Shima nuk ka dhënë ende një deklaratë mbi atë që ka ndodhur gjatë orëve të mungesës së tij.
