Ish-kryeministri Sali Berisha ka reaguar ashpër për situatën e rëndë të zjarreve që kanë përfshirë vendin, duke akuzuar kryeministrin Edi Rama si përgjegjësin kryesor për këtë që ai e cilësoi “katastrofë”.
Në një deklaratë për mediat, Berisha e quajti qeverinë “narkoqeveri” dhe Këshillin e Sigurisë Kombëtare “narko”, duke theksuar se mungon çdo shqetësim real për menaxhimin e situatës.
Ai dënoi me tone të ashpra si zjarrvënien e qëllimshme, ashtu edhe atë të shkaktuar nga pakujdesia, duke kërkuar ndëshkime maksimale për autorët.
Sipas tij, temperaturat e larta dhe veprimet kriminale të individëve të caktuar po e përkeqësojnë situatën, ndërsa vjedhjet e qeverisë kanë lënë vendin të papërgatitur për përballjen me flakët.
Berisha: Qeveria është narkoqeveri. Këshilli i Sigurisë Kombëtare është narko, nuk ka preokupim qeveria për këto që ndodhi.
Edi Rama kalon nga kërcënim në një tjetër dhe unë absolutisht dënoj me forcën më të madhe, si një kriminel të shëmtuar atë që vë me qëllim zjarrin.
Por edhe zjarrvënia pa qëllim, kërkon që çdo qytetar, në çdo akt dhe në çdo hap të ketë parasysh që të mos krijojë, sepse është një natyrë e ndezur.
Kështu që në këtë kontekst, mbaj si përgjegjës kryesor të kësaj katastrofe, Edi Ramën, vjedhjet e tij.
Natyrisht temperaturat e larta janë terreni i kësaj që po ndodh dhe shpirti kriminal i individëve të caktuar që luajnë me zjarrin është ai që inicion, ndez zjarrin dhe ata meritojnë dënimin më të madh.
