Sulmet ajrore izraelite në Qytetin e Gazës janë intensifikuar në ditët e fundit, pasi kabineti i sigurisë i kryeministrit Benjamin Netanyahu, miratoi planet për zgjerimin e ofensivës ushtarake në këtë zonë.
Të paktën 89 palestinezë janë vrarë 31 prej të cilëve kërkonin ndihmë ndërsa rreth 513 janë plagosur gjatë 24 orëve të fundit.
Ministrat e jashtëm të 25 vendeve, përfshirë Mbretërinë e Bashkuar, Australinë, Francën, Spanjën dhe Japoninë, si dhe dy nënshkrues nga BE-ja, kanë lëshuar një deklaratë të përbashkët duke thënë se “vuajtjet humanitare në Gaza kanë arritur nivele të paimagjinueshme”.
Ata iu bëjnë thirrje qeverisë izraelite të lejojnë dërgesat e ndihmave dhe të aktorëve thelbësorë humanitarë të operojnë në Gaza.
“Ne i bëjmë thirrje qeverisë së Izraelit që të japë autorizim për të gjitha dërgesat e ndihmës nga OJQ-të ndërkombëtare dhe të zhbllokojë veprimin e aktorëve thelbësorë humanitarë. Duhet të ndërmerren hapa të menjëhershëm, të përhershëm dhe konkretë për të lehtësuar aksesin e sigurt dhe në shkallë të gjerë për OKB-në, OJQ-të ndërkombëtare dhe partnerët humanitarë. Të gjitha kalimet dhe rrugët duhet të përdoren për të lejuar një vërshim ndihme në Gaza, duke përfshirë furnizimet me ushqime, strehimin, karburantin, ujin e pastër, ilaçet dhe pajisjet mjekësore. Forca vdekjeprurëse nuk duhet të përdoret në vendet e shpërndarjes, dhe civilët, humanitarët dhe punonjësit mjekësorë duhet të mbrohen.”
Tel Avivi kritikohet çdo ditë për luftën 22-mujore ,teksa ekspertët që mbështeten nga Kombet e Bashkuara kanë paralajmëruar për uri të tejskajshme në Gaza.
Ndërsa Netanyahu po përballet me presion gjithnjë e më të madh për të siguruar lirimin e pengjeve të mbetura, si dhe për planet e tij për zgjerimin e luftës, të cilën ai është zotuar ta vazhdojë me ose pa mbështetjen e aleatëve.
Ofensiva izraelite ka vrarë të paktën 61,499 palestinezë, sipas Ministrisë së Shëndetësisë në Gazën e kontrolluar nga Hamasi, shifra të cilat Kombet e Bashkuara i konsiderojnë të besueshme.
