Kontratat e së ardhmes për arin në SHBA kanë arritur një nivel rekord të premten e 8 gushtit, pasi administrata e Donald Trump-it befasoi tregun global të arit me një plan për të vendosur tarifa mbi importet e shufrave të arit me peshë një kilogram dhe 100 ons.
Në një veprim që analistët dhe investitorët paralajmëruan se mund të riformësojë tregtinë globale të arit, Agjencia e Doganave dhe Mbrojtjes së Kufirit të SHBA-së (CBP) vendosi që këto shufra duhet t’i nënshtrohen detyrimeve doganore, duke hedhur poshtë pritshmëritë se do të përjashtoheshin nga tarifat.
Ky hap i CBP-së, i raportuar fillimisht nga Financial Times, është një goditje e veçantë për Zvicrën, eksportuesin më të madh në botë të këtij metali. Marrëdhëniet mes Uashingtonit dhe Bernës ishin përkeqësuar që javën e kaluar, pasi SHBA-të njoftuan një tarifë prej 39% mbi importet nga Zvicra.
Kontratat e së ardhmes për arin në SHBA u rritën në një rekord të ri ditor prej 3 mijë e 534 dollarësh për troi ons (njësi standarde për tregtinë ndërkombëtare të metaleve të çmuara, 1 troi ons ≈ 31.1035 gramë) të premten, ndërsa çmimet në Londër mbetën të pandryshuara.
Lajmi erdhi si një “befasi e madhe”, tha Joni Teves, analiste në UBS, duke shtuar: “Kjo është pikërisht ajo që tregu kishte frikë.”
Në një shenjë të përçarjes së shkaktuar në treg, kontratat e së ardhmes për arin në bursën Comex në Nju Jork u shkëputën ndjeshëm nga çmimet spot (çmimi aktual në treg), duke arritur një premium prej më shumë se 100 dollarësh për ons të premten.
Analistët paralajmëruan se tarifa gjithashtu rrezikon rolin e Nju Jorkut si tregu më i madh në botë për kontratat e arit, pasi e rrit çmimin e arit në SHBA krahasuar me rajonet e tjera.
“Kjo krijon një problem për tregun global të arit, i cili përdor kontratat e Comex-it për të mbrojtur pozicionet,” tha Teves. “Shtrohet pyetja nëse mund të ketë mënyra alternative për të zgjidhur këto kontrata, qoftë në aspektin e produkteve apo vendndodhjeve, ose nëse qendrat e tjera bëhen më të rëndësishme.”
Kur Trump nisi vendosjen e tarifave të gjera në atë që e quajti “ditën e çlirimit” në fillim të prillit, ato përfshinë një përjashtim për një kategori të arit që mbulonte shumicën e importeve të arit në SHBA.
Një dokument informues i publikuar nga Shtëpia e Bardhë më 2 prill gjithashtu deklaronte se “ari në shufra” ishte i përjashtuar nga tarifat e ashtuquajtura reciproke.
Megjithatë, vendimi i CBP-së, i përfshirë në një letër zyrtare të datës 31 korrik, përmbysi një praktikë të kahershme në treg, duke përcaktuar se shufrat e arit me peshë një kilogram dhe 100 ons duhet të klasifikohen sipas një kodi doganor tjetër, një që nuk është përfshirë në listën e përjashtimeve.
Tregtarët kishin grumbulluar një sasi rekord ari në bursën Comex më herët këtë vit, ndërsa përgatiteshin për mundësinë, sado të vogël, që ari të përfshihej në tarifat doganore.
“Lëvizjet e çmimeve sot do të kishin qenë shumë më të dhunshme nëse bankat dhe institucionet e tjera financiare nuk do të kishin zhvendosur kaq shumë ar në SHBA gjatë tetë muajve të fundit,” tha John Reade, strategu i lartë i tregut në Këshillin Botëror të Arit. “Në fund, kujdesi rezultoi të ishte zgjedhja e duhur.”
Disa pjesëmarrës në treg besojnë në mënyrë jozyrtare se CBP mund të ketë bërë një gabim dhe shpresojnë që departamenti doganor do të ndryshojë vendimin./Financial Times
