Julian Balla është shpallur në kërkim nga Struktura e Posaçme Kundër Korrupsionit dhe Krimit të Organizuar (SPAK), si pjesë e një operacioni të gjerë kundër trafikut të 17 tonëve kokainë.
Ai rezulton të jetë pronar i resortit luksoz “Ajman Park” në Xhafzotaj, Durrës, si dhe i një vile dykatëshe tip “ELYSIAN” në zonën bregdetare të Dhërmiut, me një vlerë mbi 1 milion euro. Të dyja këto pasuri janë vendosur nën sekuestro nga Gjykata e Posaçme, me kërkesë të Prokurorisë së Posaçme, si pjesë e hetimeve për pastrim parash dhe përfshirje në trafik ndërkombëtar të lëndëve narkotike.
Balla është gjithashtu president i klubit të futbollit “Erzeni”, dhe në daljet e tij publike ka promovuar investime të mëdha në sport dhe në sektorin e shërbimeve.
Resorti “Ajman Park”, që ndodhet në zonën e Shijakut, konsiderohet një nga më luksozët në rajon, duke përfshirë mijëra metra katrorë sipërfaqe dhe me një vlerë që arrin në miliarda lekë.
Operacioni i SPAK ka përfshirë gjithsej 16 masa sigurie, ku bëjnë pjesë edhe emra të njohur të botës së krimit të organizuar, si vëllezërit Çela dhe Franc Çopja, të dyshuar për rol të rëndësishëm në rrjetet e trafikut të drogës dhe pastrimit të parave përmes investimeve në Shqipëri./tch
