Në një intervistë për Fox News, kryeministri izraelit Benjamin Netanyahu ka deklaruar se Izraeli synon të marrë kontrollin e plotë të Rripit të Gazës, por nuk dëshiron ta qeverisë atë. Komentet e tij u bënë këtë të enjte, pak para se kabineti i sigurisë të mblidhej për të shqyrtuar propozimin e tij për marrjen nën kontroll të territorit.
“Ne synojmë të marrim kontrollin për të garantuar sigurinë tonë, për të larguar Hamasin nga aty, për t’i mundësuar popullsisë të çlirohet nga Hamasi dhe për ta kaluar nën qeverisje civile që nuk është Hamasi dhe që nuk përfaqëson asnjë që synon shkatërrimin e Izraelit”, tha Netanyahu. Ai shtoi se Izraeli kërkon një perimetër sigurie dhe dëshiron t’ia kalojë qeverisjen forcave arabe: “Nuk duam ta mbajmë atë. Duam një perimetër sigurie. Nuk duam ta qeverisim. Nuk duam të jemi aty si autoritet qeverisës.”
Mbledhja e kabinetit të sigurisë zhvillohet ndërsa presioni ndërkombëtar ndaj Izraelit rritet për shkak të krizës humanitare në Gaza, me agjencitë e OKB-së që paralajmërojnë për uri masive në territorin e shkatërruar. Ministria e Shëndetësisë në Gaza njoftoi se katër persona të tjerë kanë vdekur nga uria dhe kequshqyerja gjatë 24 orëve të fundit, duke e çuar numrin total të viktimave nga uria në 197, përfshirë 96 fëmijë, që nga fillimi i luftës së Izraelit pas sulmeve të Hamasit më 7 tetor 2023 në jug të Izraelit.
Mediat izraelite raportojnë se Netanyahu pritet të kërkojë miratimin për zgjerimin e operacioneve ushtarake, përfshirë në zona të dendura ku besohet se mbahen pengje. Kjo ndodh pavarësisht shqetësimeve në rritje për fatin e pengjeve të mbetura, disa nga familjarët e të cilëve dolën në det nga porti i Ashkelonit të enjten për t’u afruar drejt Gazës.
Para mbledhjes, në mediat izraelite qarkulluan zëra për përplasje mes kabinetit dhe shefit të ushtrisë, gjeneralit Eyal Zamir, i cili thuhet se kundërshton planet për rikthimin e plotë të kontrollit në Gaza. Të mërkurën, ministri i Mbrojtjes, Israel Katz, deklaroi në rrjetet sociale se “është e drejtë dhe detyrë e shefit të shtabit të shprehë qëndrimin e tij”, por ushtria duhet të respektojë vendimet e qeverisë. Të enjten, në një deklaratë zyrtare, Zamir theksoi pavarësinë e tij, duke premtuar se do të “vazhdojmë të shprehim qëndrimin tonë pa frikë”. Ai shtoi: “Nuk po merremi me teori, po merremi me çështje jete a vdekjeje, me mbrojtjen e shtetit, dhe këtë e bëjmë duke i parë drejt në sy ushtarët dhe qytetarët tanë.”
