Markat e shtrenjta po përpiqen të kuptojnë pse shitjet janë dobësuar kaq shumë kur në fakt nuk po jetojmë në kohëra të ndonjë krize financiare.
A po kalon industria e luksit një krizë të përkohshme apo është diçka më serioze?
Bernard Arnault, pronari miliarder i Louis Vuitton dhe mbi 70 markave të tjera luksoze, thotë se rënia aktuale e shitjeve do të kalojë. Por investitorët janë të shqetësuar se diçka nuk po shkon.
Kur kompania LVMH raportoi rezultatet së fundmi, tha se shitjet në sektorin e modës dhe produkteve prej lëkure ranë me 9% në tremujorin e dytë krahasuar me një vit më parë, më keq se sa pritej. Menaxhmenti fajësoi rënien e shpenzimeve të turistëve për kërkesën e ulët ndaj markave si Louis Vuitton dhe Christian Dior.
Konsumatorët mund të jenë ende duke përvetësuar gjithçka që blenë gjatë “etheve” të luksit në pandemi. Por diçka nuk duket në rregull. Këtë vit, sipas vlerësimeve të Bernstein, pritet që shitjet në të gjithë industrinë e luksit të qëndrojnë në vend. Kjo është e pazakontë, pasi zakonisht industria rritet me një ritëm dyfish më të madh se rritja ekonomike globale dhe ky do të jetë viti i dytë radhazi me kërkesë të dobët: 2024 ishte performanca më e dobët e sektorit që prej krizës financiare globale të 2008-ës, ndonëse nuk pati recesion.
Të dhënat nuk tregojnë se markat e mëdha të luksit po humbasin ndjeshëm pjesë të tregut ndaj markave të vogla e të reja. Por disa lloje të produkteve luksoze kanë dalë nga moda. Çmimet e çantave të dorës u rritën në mënyrë të çmendur gjatë pandemisë dhe konsumatorët kanë zhvendosur shpenzimet e tyre drejt kategorive që u duken më me vlerë.
Markat e luksit po përballen gjithashtu me një problem te konsumatorët e rinj. Vitin e kaluar, shitjet për gjeneratën Z ranë me 7%, që përkthehet në një ulje prej 5.7 miliardë dollarësh. Kjo është tkurrja më e madhe ndër të gjitha gjeneratat. Ata duken të zhgënjyer nga mallrat e luksit pas publikimit të historive virale në rrjete sociale për abuzime në zinxhirët e prodhimit dhe çmimeve të ekzagjeruara.
E nëse brezi i ri, që janë e ardhmja, nuk i do mallrat e luksit, si do të shkojë kjo histori?
