Të paktën 54 emigrantë kanë vdekur në brigjet e Jemenit pasi varka e tyre u fundos për shkak të motit të keq. Më parë, burime të sigurisë në Jemen kishin njoftuar se 27 persona ishin konfirmuar të vdekur pas fundosjes së varkës, ndërkohë kërkimet po vazhdonin për një numër të madh personash të zhdukur.
Varka, që mbante 150 persona, po shkonte drejt bregdetit të provincës Abyan të Jemenit dhe sipas autoriteteve jemenase, shumë prej emigrantëve janë shtetas etiopianë.
Pavarësisht luftës që ka shpërthyer në Jemen që nga viti 2014, valë emigrantësh vazhdojnë të mbërrijnë në vend, kryesisht nga Etiopia.
Emigrantët po kalojnë ngushticën Bab al-Madaga që ndan Xhibutin nga Jemeni, një rrugë e rëndësishme për tregtinë ndërkombëtare, si dhe për migrimin dhe trafikimin e qenieve njerëzore.
Sipas Organizatës Ndërkombëtare për Migracionin (IOM), dhjetëra mijëra njerëz janë të bllokuar në Jemen, duke vuajtur abuzim dhe shfrytëzim gjatë udhëtimit të tyre. Rreth 60,900 emigrantë mbërritën në Jemen në vitin 2024, sipas IOM-it.
