Një ngjarje e pazakontë ka ndodhur mbrëmjen e djeshme në qytetin e Korçës, ku një djalë i ri ka sulmuar me gurë bashkinë e qytetit.
‘Iliria News’ mëson se djali i ri e ndërmori sulmin ndaj Bashkisë, pasi drejtuesit e kësaj të fundit kishin dhënë urdhër për prishjen e lokaleve që kishin zaptuar hapësirat publike në lagjen nr. 14, ku djali pinte kafe herë pas here.
Ky urdhër nuk është pritur mirë nga korçari, i cili nuk e ka përmbajtur dot veten. Në orët e vona të mbrëmjes së djeshme, ai kishte hyrë live në ‘TikTok’ dhe shkoi para bashkisë.
Teksa mbante gurin në dorë ai tha: Dëgjoje këtë! Krisma e parë. Shiko ku mbeti shenja. Dëgjoje dhe këtë tjetrën.
Pasi i la dy shenja xhamave të bashkisë, një roje e pyeti se çfarë ishte duke bërë. I riu iu përgjigj qetësisht: ÇFARË I KAM BËRË UNË EDI RAMËS QË MË PRISH LOKALET E LAGJES? I KAM NDONJË BPRXH?
Pas kësaj policia e ka identifikuar të riun dhe e ka proceduar penalisht. Ai njihet si përdorues i lëndëve narkotike.
