Deputeti i Kuvendit të Kosovës, Adem Hoxha, bashkëshortja e tij dhe vajza e tyre e mitur janë dhunuar nga një 61-vjeçar.
Ngjarja ka ndodhur një ditë më parë në fshatin Zlipotok të Dragashit pas një konflikti.
Ata dyshohet se janë përfshirë në një përleshje fizike me të dyshuarin S.K, rreth 61 vjeç. Motivi i incidentit, sipas autoriteteve, mbetet ende i paqartë.
Ngjarja është konfirmuar edhe nga zëdhënësi i Policisë për rajonin e Prizrenit, Shaqir Bytyqi i cili ka thënë se me datë 1 gusht, rreth orës 18:30, Policia është njoftuar nga QKMF-ja në Dragash se një person është paraqitur me lëndime trupore, të cilat i kishte marrë si pasojë e një përleshjeje të ndodhur në fshatin Zlipotok.
“I lënduari, pas marrjes së ndihmës së parë, është dërguar në Spitalin Rajonal të Prizrenit, ku sipas raportit të mjekut, ka pësuar lëndime të lehta trupore. Rastit i janë përgjigjur menjëherë patrullat e Stacionit Policor në Dragash si dhe njësiti i hetimeve, në bashkëpunim të ngushtë me hetuesit rajonalë, për shkak të ndjeshmërisë së rastit. Sipas informacioneve të para, të lënduarit janë qytetari A.H, mashkull, bashkëshortja e tij dhe vajza e tyre e mitur. Motivi i incidentit mbetet ende i paqartë. Në koordinim me prokurorin kujdestar, është iniciuar rasti “Lëndim i lehtë trupor”, ndërsa i dyshuari është ndaluar me vendim të prokurorit për 48 orë.”
