Një nga simbolet më historike të Vlorës rrezikon të mbyllet plotësisht!
Burimi i njohur i ujit pranë tunelit në zonën e “Ujit të Ftohtë”, i cili prej dekadash ka qenë funksional, është bllokuar nga mbetje inerte dhe mbeturina. Ky burim, i rëndësishëm për shumë qytetarë që nuk kanë akses të rregullt në ujë të pijshëm në shtëpitë e tyre, po përballet me një situatë të vështirë.
Sipas disa banorëve, mbetjet janë hedhur qëllimisht, duke dëmtuar rëndë funksionimin e burimit. Ndërkohë, një pjesë tjetër e qytetarëve beson se bllokimi është pasojë e dallgëve të detit gjatë motit të keq, të cilat mund të kenë sjellë mbeturinat në zonë.
Qytetarët kërkojnë ndërhyrje urgjente për pastrimin e burimit, me qëllim që ai të kthehet në gjendjen e mëparshme dhe të përdoret lehtësisht nga të gjithë. Megjithatë, disa prej tyre kanë ngritur shqetësimin edhe për cilësinë e ujit, duke theksuar se ai mund të mos përmbushë standardet e duhura për konsum.
Burimi përdoret çdo ditë nga qindra qytetarë të Vlorës dhe më gjerë, duke e bërë të domosdoshme zgjidhjen e kësaj problematike në kohë sa më të shkurtër.
