Delegacioni i Bashkimit Evropian ka reaguar lidhur me projekt-amendamentet e reja të Kodit Penal të prezantuara nga qeveria shqiptare.
BE shpreh shqetësime për përmbajtjen dhe mënyrën e hartimit të projekt-amendamentev.
BE konfirmon se nuk ka qenë pjesë e grupit të ekspertëve që ka hartuar ndryshimet dhe se aktualisht po shqyrton në detaje përmbajtjen e tyre, për shkak të ndikimit të mundshëm që mund të kenë mbi të drejtat e qytetarëve, lirinë e shprehjes dhe lirinë e medias.
Deklarata nënvizon se disa prej dispozitave të propozuara nuk përputhen me standardet e BE-së, ndërsa thekson nevojën për një proces gjithëpërfshirës konsultimi me institucionet e drejtësisë dhe shoqërinë civile.
Në kuadër të negociatave të anëtarësimit në Bashkimin Evropian, BE-ja i kërkon Shqipërisë të ndryshojë një numër dispozitash specifike të Kodit Penal për t’u përafruar standardeve evropiane dhe legjislacionit të BE-së.
BE-ja shpreh gatishmërinë për të ofruar asistencë teknike dhe mbështetje në përmbushjen e standardeve evropiane, duke apeluar për transparencë dhe gjithëpërfshirje në procesin legjislativ.
Deklarata e BE-së:
Bashkimi Evropian ka marrë njoftim mbi prezantimin e projekt-amendamenteve të Kodit Penal, rezultat i punës së një grupi ekspertësh të ngarkuar nga qeveria.
Bashkimi Evropian nuk ka qenë pjesë e këtij grupi ekspertësh dhe aktualisht po shqyrton projekt-ndryshimet e propozuara, të cilat përfshijnë një gamë të gjerë çështjesh.
Megjithatë, jemi në dijeni për shqetësimet serioze të shprehura nga përfaqësues të sistemit të drejtësisë, si dhe nga shoqëria civile, në lidhje me disa prej ndryshimeve të propozuara. Jemi veçanërisht të shqetësuar për ndryshimet ligjore të propozuara nga grupi i punës, të cilat mund të kenë ndikim negativ mbi të drejtat e qytetarëve, lirinë e shprehjes dhe lirinë e medias. Këto dispozita nuk janë në përputhje me standardet e BE-së dhe jemi të bindur se, në kuadër të procesit të konsultimit dhe në kuadër të angazhimeve për anëtarësim, këto shqetësime do të adresohen.
Rishikimi i përgjithshëm i Kodit Penal është një proces i rëndësishëm dhe kompleks, me një ndikim të mundshëm afatgjatë në shoqëri dhe në sistemin e drejtësisë, BE-ja nënvizon rëndësinë e garantimit të një konsultimi gjithëpërfshirës dhe të plotë me të gjitha institucionet kryesore të drejtësisë dhe aktorët e shtetit të së drejtës, si dhe me shoqërinë civile, për të garantuar cilësinë më të lartë të legjislacionit që do të miratohet.
Në kuadër të negociatave të anëtarësimit në Bashkimin Evropian, Shqipëria pritet të ndryshojë një numër dispozitash specifike të Kodit Penal për t’u përafruar standardeve evropiane dhe legjislacionit të BE-së. Në periudhën afatshkurtër, BE-ja e inkurajon Shqipërinë t’i japë përparësi atyre ndryshime legjislative që janë të nevojshme për të përmbushur standardet ndërmjetëse të përcaktuara në Qëndrimin e Përbashkët të BE-së për Grup-kapitullin 1 (p.sh. dekriminalizimi i shpifjes, rishikimi i kuadrit ligjor për trafikun e drogës, trafikun e qenieve njerëzore, abuzimin me fëmijët, armët e zjarrit, pastrimin e parave). BE-ja është e gatshme të ofrojë ndihmë teknike në këtë drejtim.
