Drejtuesi gjerman i një operacioni të përbashkët të SPAK me Gjermaninë, Oliver Hoffmann ndodhet në Tiranë ku ka ndjekur nga afër operacionin e zhvilluar mëngjesin e kësaj të enjte, për goditjen e një grupi që merrej me mashtrimin përmes call centerave.
Operacioni ka nisur 18 muaj më parë dhe ai e ka konsideruar ditën e sotme, si “një ditë të rëndësishme, një piketë kyçe në luftën tonë kundër krimit të organizuar ndërkombëtar.”
Krah prokurorit Ened Nakuçi në SPAK, oficeri i lartë gjerman ka treguar detaje nga operacioni “Pandora” dhe mënyra sesi janë ndjekur çdo ditë 20 telefonata live, dhe më pas është ngritur një kundërqendër për të shpëtuar viktimat nga mashtrimi.
“Ky operacion nisi në Dhjetor 2023 dhe në atë kohë filluam të përgjonim live mbi 20 telefonata mashtruese dhe krijuam një kundërqendër për të parandaluar këto thirrje mashtruese, duke shpëtuar një dëm të mundshëm prej 10 milionë euro.
Paralelisht me këtë, zhvilluam dhe hetime komplekse kundër krimit kompjuterik për të lokalizuar qendrat telefonike dhe autorët, në Shqipëri, Kosovë, Bonjë Hercegovinë, Serbi dhe Liban. Qëllimi nuk ishte vetëm arrestimi, por dhe goditja e kësaj organizate kriminale.
Ky operacion ka çuar në goditjen e 12 qendra thirrjesh ndërkombëtare. Janë dhënë dhe dënimet e para dhe ndër ta organizuese kryesor në Gjermani. Me SPAK dhe Policinë e Shtetit Shqiptar kemi pasur një bashkëpunim të ngushtë”, u shpreh Oliver Hoffmann.
