Territori shqiptar do të mbetet nën ndikimin e masave ajrore të nxehta nga Afrika, duke sjellë mot të kthjellët dhe temperatura përvëluese në pjesën më të madhe të vendit. Qarku i Shkodrës dhe ai i Elbasanit do të përballen sërish me vlera ekstreme temperaturash, ku termometri pritet të kapërcejë 40°C.
Gjatë pasdites parashikohet shtim i vranësirave të përkohshme në zonat malore lindore, ndërsa bregdeti dhe zonat e ulëta do të vijojnë me kthjellime dhe diell të nxehtë.
Temperaturat minimale do të pësojnë një rënie të lehtë, ku në zonat malore priten vlera deri në 19°C. Megjithatë, vlerat maksimale do të mbeten shumë të larta, me kulm mbi 40°C në Koplik, Urën Vajgurore dhe Cërrik.
Era do të fryjë e lehtë deri mesatare nga drejtimi veriperëndimor me shpejtësi që në momente të caktuara mund të arrijë mbi 40 km/h. Në zonat bregdetare kjo do të sjellë dallgëzim të moderuar në det, me intensitet 2-3 ballë.
Autoritetet u bëjnë thirrje qytetarëve të shmangin qëndrimin në diell gjatë orëve të pikut dhe të kujdesen për hidratimin, sidomos fëmijët dhe të moshuarit.
