Kreu i Nisma “Shqipëria Bëhet”, Adriatik Lapaj është i vendosur që të marrë mandatin e deputetit në Tiranë. Ditën e nesërme kryekomisioneri Ilirjan Celibashi pritet që të bëjë shpërndarjen e mandateve, por Lapaj përmes një shkrese që mbn datën e sotme, i kërkon KQZ që të miratojë dorëheqjet e 12 kandidatëve të listës së mbyllur.
Në kërkesë, theksohet se të gjithë gjithë kandidatët e listës së mbyllur për qarkun e Tiranës kanë dhënë dorëheqjen nga kandidimi, më datë 11 maj 2025, përpara fillimit të procesit të numërimit të votave.
“I nderuar z. Komisioner,
Nisma “Shqipëria Bëhet” me Vendimin Nr. 237, dt. 04.03.2025, është regjistruar në KQZ si koalicion për zgjedhjet parlamentare të dt. 11 maj 2025, me përfaqësues z. Adriatik Lapaj në cilësinë e drejtuesit të koalicionit.
Në Qarkun Tiranë, ky koalicion ka siguruar 16,520 vota, duke fituar një mandat përfaqësimi. Ju bëjmë me dije se të gjithë kandidatët e listës së mbyllur për këtë qark kanë paraqitur dorëheqjen nga kandidimi, më datë 11 maj 2025, përpara fillimit të procesit të numërimit të votave.
Bazuar në Nenin 97, të Kodit të Procedurave Administrative, përsa kohë organi publik, në këtë rast Komisioni Qëndror i Zgjedhjeve, nuk është shprehur me vendim konsiderohen të miratuara në heshtje.
Në këtë kuadër, kërkojmë konfirmimin me shkrim se dorëheqjet e paraqitura janë konsideruar të miratuara në heshtje, në përputhje me ligjin në fuqi”, thuhet në shkresën drejtuar KQZ.
Disa ditë më parë, daja i Endri Shabanit, Zeqir Kordhoni, i cili ndodhej në listë të mbyllur kërkoi mandatin e deputetit dhe u shpreh se në momentin që firmosi dorëheqjen nga kandidimi i tij fiktiv në zgjedhjet parlamentare nuk ishte në dijeni se çfarë po bënte.
Kjo solli përçarje mes Lapajt dhe Shabanit. Nga njëra anë Adriatik Lapaj i akuzoi për pabesi Shabanin dhe Kordhonin, ndërsa Shabani tha se nuk mund të mbajë përgjegjësi për dajën e tij 60-vjeçar.
Sipas Shabanit reagimi i Zeqirit për të mos u dorëhequr erdhi pasi vetë Lapaj nuk e mbajti fjalën, pasi ishte po ai që pati deklaruar para zgjedhjeve se nëse koalicioni fiton vetëm 1 mandat, nuk do të ishte ai që do e merrte, por i dyti më i votuari.
