Policia zvicerane vijon kërkimet për 23-vjeçarin shqiptar që u arratis në Baden, ndërsa ishte nën shoqërimin e një roje sigurie. I riu arriti të largohej me pranga në duar, pak para se të hipte në një automjet të transportit.
Sipas zëdhënësve të Policisë Kantonale të Aargaut dhe Cyrihut, operacioni për kapjen e të arratisurit është përqendruar në zonën malore të Lägern, ku janë përfshirë forca të shumta policie, helikopterë, qen gjurmues dhe mjete të specializuara. Terreni i vështirë pyjor dhe i pjerrët ka penguar kërkimin, i cili deri mëngjesin e së shtunës nuk ka dhënë rezultat.
Autoritetet dyshojnë se 23-vjeçari mund të ketë pasur bashkëpunëtorë jashtë, që mund ta kenë ndihmuar të largohet menjëherë pas arratisjes. Edhe pse nuk cilësohet si rrezik për publikun, policia u bën thirrje qytetarëve të mos i afrohen, por të raportojnë çdo informacion të mundshëm.
Vendimi për vazhdimin dhe mënyrën e organizimit të kërkimeve do të merret nga drejtuesi i operacionit në vijim të hetimeve.
