Connie Francis, një nga ikonat më të mëdha të muzikës pop të viteve ’50 dhe ’60, është ndarë nga jeta në moshën 87-vjeçare. Lajmin e hidhur e ka konfirmuar miku dhe publicisti i saj, Ron Roberts, përmes një postimi në faqen zyrtare të Francis në Facebook.
“Me zemër të rënduar dhe me një trishtim të thellë, ju njoftoj për ndarjen nga jeta të mikes sime të dashur, Connie Francis, mbrëmjen e kaluar”, shkruan Roberts. “E di që Connie do të dëshironte që pikërisht fansat e saj të ishin të parët që mësojnë këtë lajm të trishtuar”.
Së fundmi, kënga e saj “Pretty Little Baby” ishte bërë virale në rrjetet sociale, duke u përdorur nga miliona vetë në postimet e tyre.
Francis ishte së fundmi e shtruar në spital për shkak të disa problemeve me dhimbjet fizike dhe ishte detyruar të anulonte disa paraqitje publike në fillim të këtij muaji. Gjendja e saj shëndetësore ishte bërë shqetësuese, por asgjë nuk paralajmëronte një fund kaq të afërt.
E lindur në vitin 1937, Connie Francis u bë një yll ndërkombëtar falë zërit të saj të fuqishëm dhe interpretimit emocional që la gjurmë në historinë e muzikës. Këngë si “Pretty Little Baby”, “Who’s Sorry Now?”, “Lipstick on Your Collar” dhe “Stupid Cupid” u kthyen në hite të pavdekshme, duke i dhënë zë një brezi të tërë adoleshentësh dhe e duke e ngjitur në majat e klasifikimeve muzikore në mbarë botën.
Përveçse këngëtare, Francis ishte edhe aktore, duke shfaqur talentin e saj në disa filma të njohur të Hollywood-it. Jeta e saj nuk ka qenë e lehtë; ajo përjetoi trauma personale dhe sfida shëndetësore gjatë dekadave, por gjithmonë gjeti forcë të rikthehej në skenë dhe të mbante gjallë lidhjen e saj me publikun.
