Presidenti i SHBA-së, Donald Trump, ka deklaruar se Prokurorja e Përgjithshme, Pam Bondi, duhet të publikojë “çdo gjë që ajo e konsideron të besueshme” në lidhje me shkelësin seksual Jeffrey Epstein, në një kohë kur po përballet me një valë të rrallë kritikash edhe nga mbështetësit e tij, përpjekje që vijnë pas tentativës së tij për ta mbyllur këtë çështje.
Pam Bondi është përballur me kritika nga baza politike e Trump pas deklaratës së saj javën e kaluar, kur tha se nuk ka prova që Epstein mbante një “listë klientësh” apo që shantazhonte figura të fuqishme.
Gjatë fundjavës, Trump u bëri thirrje mbështetësve të mos “shpenzojnë kohë dhe energji” për këtë çështje. Megjithatë, aleatë të presidentit, përfshirë Kryetarin e Dhomës së Përfaqësuesve, Mike Johnson, kanë kërkuar më shumë transparencë.
Në një konferencë shtypi të martën, e fokusuar në krizën e fentanilit, Bondi shmangu pyetjet në lidhje me Epstein. “Asgjë për Epstein,” tha ajo për gazetarët. “Nuk do të flas për Epstein.”
Ajo shtoi se dokumenti i javës së kaluar nga Departamenti i Drejtësisë, i publikuar bashkë me FBI-në, që konfirmon vetëvrasjen e Epstein dhe refuzon publikimin e dosjeve të tjera, “flet vetë”.
Në shkurt, Bondi kishte deklaruar për Fox News se një listë e klientëve të Epstein ndodhej në zyrën e saj për shqyrtim, por zëdhënësi i saj sqaroi javën e kaluar se ajo kishte pasur parasysh dosjen e përgjithshme të rastit.
Sipas Departamentit të Drejtësisë, gjetjet e fundit janë rezultat i shqyrtimit të më shumë se 300 gigabajtëve të dhëna.
Të martën, ligjvënësit demokratë në Dhomën e Përfaqësuesve tentuan, pa sukses, të detyronin një votim për publikimin e dosjeve të Epstein. Republikanët theksuan se edhe administrata e presidentit demokrat Joe Biden kishte qasje në dosje, por nuk kishte marrë masa për publikimin e tyre.
Epstein vdiq në vitin 2019 në një burg federal në SHBA, ndërsa po priste gjykimin për akuza të trafikut seksual. Vdekja e tij u cilësua si vetëvrasje, por shumë anëtarë të lëvizjes “Make America Great Again” të Trump kanë ngritur teori se të dhëna të rëndësishme mbi rrjetin e tij kriminal janë mbajtur të fshehura për të mbrojtur figura të fuqishme apo agjenci inteligjente.
Të martën, Trump vlerësoi menaxhimin e çështjes nga Bondi: “Ajo e ka trajtuar shumë mirë. Tashmë është në dorën e saj. Çfarëdo që ajo e konsideron të besueshme, duhet ta publikojë,” tha ai. Kur u pyet nëse Bondi i kishte thënë nëse emri i tij përmendej në ndonjë dokument, ai u përgjigj: “Jo, jo.”
Më vonë gjatë ditës, presidenti përsëriti thirrjen për të publikuar “informacion të besueshëm”, por kritikoi interesin e vazhdueshëm publik për këtë çështje, duke e quajtur “të shëmtuar, por të mërzitshme”.
“Vetëm njerëzit e këqij, përfshirë mediat e rreme, duan ta mbajnë këtë çështje gjallë,” u shpreh Trump. Javën e kaluar, ai kishte shprehur pakënaqësi për përqendrimin e madh tek Epstein dhe kishte kërkuar që vëmendja të zhvendosej diku tjetër.
Megjithatë, disa aleatë republikanë të presidentit nuk janë të gatshëm ta lënë çështjen pas.
Në një intervistë të martën me komentatorin konservator Benny Johnson, Kryetari i Dhomës, Mike Johnson, u shpreh se i beson Trumpit dhe ekipit të tij, por shtoi se Bondi “duhet të dalë dhe t’i shpjegojë gjithçka publikut”.
“Duhet të publikojmë gjithçka dhe t’ia lëmë njerëzve të vendosin,” tha ai.
Kongresistja republikane nga Xhorxhia, Marjorie Taylor Greene, gjithashtu shprehu mbështetje për transparencën e plotë mbi këtë çështje. Ajo vlerësoi punën e Bondi si prokurore, por theksoi se liderët dhe zyrtarët e zgjedhur duhet të mbajnë premtimet që u japin votuesve.
Republikania konservatore nga Kolorado, Lauren Boebert, deklaroi se nëse nuk do të ketë më shumë publikime të dokumenteve mbi Epstein, atëherë duhet emëruar një prokuror i posaçëm për të hetuar rastin.
Senatori republikan John Kennedy nga Luiziana tha për NBC News se qytetarët amerikanë kërkojnë llogaridhënie.
“Mendoj se është plotësisht e kuptueshme që njerëzit duan të dinë kujt ia trafikoi ai [Epsteini] ato gra dhe pse ata persona nuk janë ndjekur penalisht,”tha ai.
Ndërkohë, republikanë të tjerë me ndikim, si senatori John Thune dhe kongresmeni Jim Jordan, kanë zgjedhur të mbështesin qëndrimin e Presidentit Trump për këtë çështje.
