Babai i një prej pengjeve izraelite që u morën nga Hamasi më 7 tetor 2023 ka ardhur në Tiranë në takimet me drejtues të institucioneve shqiptare. I biri 18-vjeçar i Alon Nimrodit, u mor peng nga Hamasi në Izrael në 7 tetor të vitit 2023. Babai i 18-vjeçarit tha për News24 se ka ardhur në Tiranë për të kërkuar ndihmën e shtetit shqiptar që të mësojë fatin e të birit.
Ndër të tjera ai ka treguar se ka takuar në vendin tonë edhe drejtues të shtetit, mes të cilëve përmend kryetaren e kuvendit, së cilës i ka kërkuar ndihmë për të mësuar fatin e djalit të tij, duke kërkuar ndihmë nga kolegët turq.
“Im bir u mor peng ndërsa ishte në një bazë ushtarake si vullnetar. Ishte i paarmatosur dhe është marr me pizhama, pa këpucë dhe pa syze. Para se të merrej peng, i ka çuar një mesazh të ëmës, ku i thotë se ka një sulm e do t’i evakuonin, por më pas ne pamë një video të Hamasit ku shihej që ai ishte marrë peng.
Shqipëria është një vend i vogël, por i fortë dhe përgjatë historisë i ka mbështetur hebrenjtë. Ne duam që Shqipëria të bëjë përpjekjet e saj për pengjet. Ky nuk është poster, është imazhi i tim, biri, një qenie njerëzore, një shpirt. Në dhomën e tij kemi gjetur këtë shënim ku thuhet: Ndihmo sa më shumë njerëz, bëj miq të mirë dhe mos lëndo askënd”, tha babai i pengut izraelit.
