Banori me aftësi të kufizuara nga Thethi, Bekim Koçeku, ka vazhduar edhe sot protestën e tij kundër fadromave të IKMT-së, të cilat po synojnë shembjen e shtëpive që ai ka ndërtuar me shumë mund, bashkë me ndihmën e motrës së tij të ndjerë. I vendosur për të mbrojtur punën e tij, Bekimi ka shprehur një forcë të jashtëzakonshme përballë këtij sulmi.
Në një moment tepër emocionues, ai ka shkëmbyer disa fjalë pranë një përkujtimoreje kushtuar motrës, duke theksuar rolin e saj jetik në ngritjen e shtëpive që shërbejnë për të mirëpritur turistët në këtë rajon malor.
Bekimi ka shpjeguar se pa ndihmën e saj, këto banesa nuk do të ishin ngritur kurrë, duke e kthyer qëndresën e tij në një akt nderimi ndaj saj dhe një thirrje për drejtësi.
“Kjo pemë është përkujtimi i motrës time, ka sakrifica, ka gjak dhe ka gjithçka për mua. Ajo më ka ndihmuar shumë dhe më ka thënë të ndërtoj, pa beton, pa asgjë. Ka mbledhur fonde dhe ndihma, ka shitur edhe gjakun për të më ndihmuar në ndërtimin e këtyre shtëpive. Ende nuk ka kaluar një vit, pesë-gjashtë muaj që u nda nga jeta. Ku të shkojë më keq?” ka thënë ai, me një dhimbje të thellë në zërin e tij.
