Një ditë më parë, pas sulmit me lëndë djegëse (molotov) ndaj mjetit të IKMT-së dhe urës në Theth, fillimisht u përpoq të fshihej ngjarja.
Megjithatë, pas publikimit të videove në media dhe në rrjetet sociale, Policia e Shtetit lëshoi një komunikatë zyrtare, ku tentoi të minimizonte incidentin. Ajo deklaroi se “asnjë mjet nuk është sulmuar”, duke shtuar se kishte pasur vetëm një tentativë për djegien e urës.
Pamjet filmike të publikuara ditën e djeshme treguan qartë flakët pranë mjetit të IKMT-së, ndërkohë që materialet e reja të shpërndara sot përgënjeshtronin versionin zyrtar të policisë. Këto pamje tregojnë se një bombë molotov është hedhur direkt mbi eskavatorin e IKMT-së, duke ngritur dyshime mbi korrektësinë e komunikatës zyrtare.
Në deklaratën e saj, Policia e Shtetit theksoi:
“Sqarojmë se asnjë mjet fadromë nuk është sulmuar me lëndë djegëse dhe nuk është shkaktuar asnjë dëm material apo rrezik për jetën e qytetarëve apo punonjësve të shërbimeve shtetërore.”
Ndërkohë, burime nga terreni bëjnë me dije se e gjithë zona e Thethit është aktualisht nën një gjendje të ngjashme me shtetrrethimin, ndërsa autoritetet janë në kërkim të autorit të sulmit.
