Një ngjarje e pazakontë ka ndodhur mbrëmjen e sotme në rrugën “Butrinti” në Sarandë, ku një ndjekje policore ka përfunduar në ujërat e detit Jon. Një automjet luksoz u ndalua nga policia, me tre persona brenda.
Në momentin e ndërhyrjes, një nga pasagjerët zbriti me vrap dhe u hodh në det, duke tentuar t’i shpëtonte ndalimit.
Ai mbante një çantë, e cila ka ngjallur dyshime për përmbajtje të sendeve të paligjshme, që mendohet se mund të jenë hedhur në ujë gjatë arratisjes. Ndërkohë, dy personat e tjerë u ndaluan nga forcat “Shqiponja” dhe u shoqëruan në komisariat.
Policia kufitare ndërhyri me një skaf dhe arriti të ndalojë personin që notonte në përpjekje për t’u larguar. Ai u nxor në breg dhe po shoqërohet nga autoritetet. Ende pritet një deklaratë zyrtare nga policia për të sqaruar motivet e ndjekjes dhe çfarë përmbante çanta e dyshuar.
