Zyra e Prokurorit të Përgjithshëm të Ankarasë thuhet se urdhëroi bllokimin e Grok, asistentit të inteligjencës artificiale për Platformën X të Elon Musk, pasi u bënë fyerje kundër Presidentit Rexhep Tajip Erdogan dhe nënës së tij.
Fyerje thuhet se u bënë edhe kundër heroit kombëtar të Turqisë dhe babait të Turqisë moderne, Ataturkut. Megjithatë, qeveria turke e mohoi bllokimin e inteligjencës artificiale: “Nuk është bllokuar, por ne mund ta bënim.”
Ministri turk i Transportit dhe Infrastrukturës, Abdulkadir Uraloglu, tha se Grok nuk është bllokuar në Turqi, por mund të bllokohet nga Ankaraja. Mediat turke raportuan se zyra e prokurorit të Ankarasë i ka dërguar një kërkesë Autoritetit Turk të Informacionit dhe Komunikimit (BTK) për të bllokuar chatbot-in pasi Grok postoi përmbajtje që konsiderohet fyese ndaj Presidentit turk Rexhep Tajip Erdogan, fesë dhe themeluesit të Republikës së Turqisë, Mustafa Kemal Ataturk.
“Nuk ka kufizime në aksesin në inteligjencën artificiale Grok, por ne do ta bllokojmë atë nëse është e nevojshme”, tha Uraloglu, siç raportohet nga Sabah, duke shtuar se është planifikuar një takim me zyrtarët e X.
Sipas Reuters, një gjykatë turke ka bllokuar qasjen në disa përmbajtje të prodhuara nga Grok, i cili kohët e fundit, pas një përditësimi, filloi të prodhonte mesazhe të konsideruara fyese ose antisemite në nivel global. Pas përditësimit të fundit, Grok filloi t’u jepte përgjigje fyese përdoruesve, të cilat më pas u panë nga mbi 2 milionë përdorues në Turqi.
